Kaam mein thodi mazaak-masti ho jaaye to kaam ka maja hi kuch aur hoga.Harami baba laaye hain kuch anokhe tarike jis se aap apne office ke sahyogiyon ko barabar pareshan kar sakte hain. Lekin isse apki roji-roti par koi bhi asar pade to bhai humko mat bolna. Aakhir hum to hain hi Haramibaba
- Ek badiya sa chinese mobile kharid lo. Uske speaker ki aawaz zordaar honi zaroori hai. Ab apna ring tone koi ghatiya sa gaana rakho jise sunke log chid jaaye. Kisi ko koi gaana bilkul pasand nahi, to usi ko apna ring tone bana lo.
- Apne kisi sahyogi ka mobile number credit card/insurance/loan dene waale marketing afsaron ko de do. Unhe keh do ki tumhara dost to karodpati hai aur kuch na kuch to zaroor lega. Wo tumhare dost ko har roj phone kar karke uska sukh-chain chheen lenge.
- Apne kisi office ke mitra ke keyboard ka taar chupke se computer se nikal do. Fir dekho bechara pareshan ho jayega aur tum maje lena.
- Kisi ka mobile 5 min ke liye mil jaaye to us par ekdum bekaar gaane ko uska hello tune bana do. Log use sawaal puchhne lagne chahiye ki bhai ye gaana kaise rakh diya.
- Apne manpasand geet ko kam se kam 17 baar lagatar chalao. Tum sirf apna manoranjan karo. Doosron se tumko kya matlab
- Sabki kursiyon mein khujli ka powder chhidak do, phir dekho unka nritya. Thoda nritya karne ka naatak tum bhi kar lena nahi to kisi ko tum par shak ho jayega.
- Apne kisi mitra ko kaho ki wo tumhare sahyogiyon ko har aadhe ghante ke baad phone karta rahe aur khoob baatein kare. Wo pareshan hokar apna sar pakad lenge.
- Shaam ko ghar jaate waqt apne office walon ki kursiyan idhar-udhar ghuma do. Fir savere dekho mazaa. Koi tumse kursi ke baare mein puche to bilkul anjaan ban jao.
- Jis din tum chhutti par ho, to apne kisi dost se office mein phone karwao. Use kehna chahiye ki use tumse baat karni hai. Aur use har ek ghante baad phone karne ko kaho.
- Din mein achanak apne desh ka rashtriya gaan computer pe chalu kar dein. Sabhi sahyogiyon ko apni kursiyon se uthna hi padega. Jo khada rehne se inkaar kare uska naam apne boss ko bata do.
- Kisi ka mobile akela mil jaaye, to ek badiya sujhaav hai. Uski contact list mein hahakar macha do. Jaise Saurav ke naam ke aage Dhoni ka no daal do aur Harbhajan ke naam ke aage Sreesanth ka mobile no daal do.
- Apne sahyogiyon ke ghar par subah-subah phone karke keh do ki aaj office ki chhutti hai. Lekin muh mein kapda lagakar kisi PCO se phone karna aur apna naam mat batana. Tum office pahunch jao aur koi na mile to usi bahane tum bhi chhutti lekar ghar aajana.
- Ye tarika kisi mahila sahyogi pe aazmao. Mauka milte hi kisi mahila ke keyboard ke 4-5 button idhar-udhar laga do. Jaise Q ki jagah S aur U ko H bana do. Thode hi button idhar udhar karoge to tumhari sharat ke baare mein pata nahi chalega. Us ladki ke dimaag ka dahi ho jaayega, lekin wo samajh nahi paayegi ki aankhir uske saath ho kya raha hai.
- Bina nahaye office jaya karo. Tumhare paseene ki sugandh se unhe apni naani yaad aa jaayegi. Tumhe train aur bus mein aane jaane mein bhi zaroor fayda milega.
- Office ki fileon ko idhar udhar mix kardo. Kisi ko bhi koi bhi file dhundne mein kam se kam 10 minute to lagne chahiye.
- Apne office ke kisi aadmi ke naam se sabke liye pizza mangvalo, tumhari pet pooja ho jayegi aur uski jeb dhili.
- Chupke se kisi sahyogi ka khaane ka dabba khali kardo ek thaili mein. Wo thaili kisi bhikari ko chupke se de do. Tumhe bada punya milega. Tumhara sahyogi jab chakraa ke bahar khaane nikle to uske saath tum bhi fokat ka khaane chale jao. Ye tarika mahine mein ek-aadh baar apnaya karo.
Note :- Ye koi bhi kaarya karte samay pakde gaye to turant ‘Jai Haramibaba’ bol dena. Do laatein extra mil jaayegi.
http://www.savemoneyworld.in/feeds/posts/default